Логотип БилингваБилингваБилингвизмъя удмурт центр

Телефон: (8 3412) 687-798

E-mail: udmbilingva@yandex.ru
Герӟет тодэтъёс

ИворъёсRSS

«Нуныкай» Ижын улӥсь покчиосты удмурт лулчеберетэн тодматӥз

Нуныкай 4 февраля

4-тӥ тулыспалэ «Пельняньлэн дунневыл нуналэз» фестиваль улсын пиналъёсты дышетонъя но ваньмон дырзэс радъянъя «Нуныкай» центрысь ӧнерчиос Ижкарын улӥсь нылпиос понна удмурт лулчеберетэн тодматонъя трос пумо мастер-классъёс радъязы.

Со нуналэ удмурт калыклэн лулчеберетэныз но кылэныз тодматскон ужрадэ кык кылэз тодӥсь нылпиос сяна котькуд мылкыд карись пыриськыны быгатӥз. Занятие вуэм пиналъёс арессыя 3 группалы люкиськыса ужазы.

«Туннэ милям центрамы аспӧртэм пумиськон ортчиз. Ӝыныезлэсь тросэз вуэм нылпиос нырысьсэ «Нуныкае» лыктэмын – вера ужрадлэн координаторез Ольга Бикузина. – Тросэзлэн анай-атайёссы мылкыд каро нылпиоссэс удмурт кыллы дышетыны».

Галимовъёслэн семьяязы ӟуч кылын верасько, нылзы К. Герд нимо нылпи садэ мыло-кыдо ветлэ. «Солы туж кельше пӧртэм удмурт ужрадъёсы пыриськыны, - пусъе анайзы Ольга Юрьевна. – «Нуныкай» усьтӥськем сярысь ялонэз адӟыса пумиськонэ вуыны малпамы, малы ке шуоно, ужрад ватсаса тодон-валан басьтон инты луэ».

Анна Галактионова занятиосы 5 но 7 аресъем нунокъёссэ ваиз. «Пиналъёсын 3 аресозязы удмурт кылын гинэ вераськылӥм, нош нылпи садэ ветлыны кутскыса - ӟучомизы, - сюлэмшугъяськонзэ шараяз Анна Фёдоровна. – Потэ вылэм «берыктыны» семьяе анай кылэз, нылпиослэн огъёзъёсынызы удмурт кылын вераськыны луонлыкъёссы мед кылдысалзы».

Центрысь ӧнерчиос пиналъёс понна тунсыко ужанрадлык дасязы – удмурт выжыкылэз пуктон, удмурт калык эктонъёс но шудонъёс, крезьгуро инструментъёсын тодматскон, горд сюйлэсь шулась пельнянь кутон, пельнянь вылтусо открытка лэсьтон но удмурт кылъёсын тодматскон.

Тодады вайытом, туэ «Нуныкай» ужа «Удмурт кенешлэн» «Билингва. О практиках формирования двуязычия в современной городской среде» ӵектосэз улонэ пыӵатон улсын. Миым проект Азьмурт грантъёсъя Фондэн ялэм вожвылъяськонын вормиз.

Дышем радлыкъя «Нуныкай» центр ужаны кутскоз вуоно арнянуналэ, 11-тӥ тулыспалэ, К. Герд нимо гимназилэн юртаз. Ужрадэ пыриськыны ӧтё удмурт кылын вераськись яке валась 2-ысен 9 аресозь пиналъёсты. Занятиосы гожтӥськыны, группаослэн ужан радлыкенызы тодматскыны луэ «ВКонтакте» сайтысь «Нуныкай» центрлэн огинлыказ (vk.com/nunykai).

Ивор вӧлмытӥсь: кык кылолыкъя «Билингва» удмурт центр.

Туспуктэмез Н.А. Степановалэн