Логотип БилингваБилингваБилингвизмъя удмурт центр

Телефон: (8 3412) 687-798

E-mail: udmbilingva@yandex.ru
Герӟет тодэтъёс

ИворъёсRSS

Билингвизмъя семинарын анай кылэз семьяын утёнъя амалъёсты шараязы

12 Семинар 27-тӥ толшоре Ижкарысь Эшъяськон юртын кык кылолыкъя семинар ортчиз. Анай-атайёс нылпиоссэс семьяазы кык кыллы дышетон амалъёссы сярысь веразы.

Кык кылолыкъя «Билингва» удмурт центрлэн та 12-тӥ семинарез ни. Азьвыл пумиськонъёсын бадӟым саклык удмурт но ӟуч кылъёслы висъяськиз ке, таяз радэ семинаре армян, азербайджан, бигер но немец семьяос пыриськизы. Сыӵе луонлык кылдӥз «Билингва. О практиках формирования двуязычия в современной городской среде» ӵектос улонэ пыӵаны кутскем улсын. Миым проект Азьмурт грантъёсъя Фондэн ялэм вожвылъяськонын вормиз.

Котырес ӝӧк сьӧрын кенешонын семинаре пыриськисьёс тужгес сюлэмшугъяськытӥсь ужпумез эскеризы – кызьы семьяын утёно анай кылэз, мукет кылъёсты гажан мылкыд пыӵатоно. «Жаляса верано, та юанын рос-прос дасям валэктонъёс ӧвӧл. Котькуд семьялэсь амалъёссэ чаклано, санэ басьтоно» - вазиськиз ужрадэ пыриськисьёслы пумиськонлэн модераторез, ӵектос бордын ужась психолог Ольга Смирнова.

Анай кылэн вераськись муртэн герӟет возён, пиналэн ялан анай кылын вераськон, анай-атайёслэн мылкыдзы, кык кылын книгаосты лыдӟон, аудиовыжыкылъёсты кылзон, нылпи садын ужась ӧнерчиослэн мылкыдзы – котькуд семьялэн нылпиосты ог вакыт кык кыллы дышетонын аслаз амалъёсыз.

Миннигараевъёслэн семьяазы пиенызы 3 аресозь удмурт сямен гинэ вераськылӥзы. Нылзэс нош мукет амалэн дышетыны малпазы – «одӥг анай-атай – одӥг кыл». Озьы, атайзы вераське ӟуч кылын гинэ, анайзы – удмуртэн. «Пимы бадӟым ини, и мон шумпотӥсько, удмурт кыллы солэн яратонэз вань шуыса. Ӟуч кыл со понна «деловой» луэ ке, удмуртэз – ӵыжы-выжыосын, матысь адямиосын вераськон» - пусйиз анайзы Елена Миннигараева.

Кык кылэз тодон мукет но кылъёсты дышетыны бадӟым юрттэт сётэ – верало ӧнерчиос. Та веран умой тупа Вавож черкогуртысь Манукян армян семьялы – нылпиоссы ӟуч но армян сяна, удмурт кылэн но капчиен верасько. «Ми азямы ужпум пуктӥм, пиналъёсмы одно ик удмурт кылэз мед дышетозы шуыса. Али нош шум гинэ потӥськом сыӵе малпанлы», - мылкыдъёссэ шараяз анайзы Алварт Паронян.

«Пиналэз анай кыллы дышетыны вань ке бадӟым мылкыд, луонлык но кылдоз», - пусйизы кенешонэ пыриськисьёс. Кыллы дышетон ӧрын бадӟым инты басьто йӧскалык огазеяськонъёсын радъяськись аспӧртэм пумиськонъёс – арнялы огпол ортчись дышетсконъёс – малпанзэ вераз немец кылъя дышетӥсь Майя Шушкова но армян кылъя дышетӥсь Каринэ Погосян.

Кенешонэ пыриськиз тодмо лингвист Артём Федоринчик. Со вераз, кызьы анай кылъёс утисько пӧртэм кунъёсын. Семинарлэн ужаз озьы ик пыриськиз профессор Ева Тулуз. Тодосчи нылпилэн улоназ анай кылзэ тодэмезлэн интыез сярысь вераськиз.

Пусйыны кулэ, семинар вакыт ик нылпиос понна дышетскон но шудон площадакос ужазы. Ваньмон дырез радъянъя «Нуныкай» огъетысь ӧнерчиос удмурт лулчеберетэн тодматсконъя тунсыко ужрад ортчытӥзы.

Ужрадэ котькуд пыриськись пусйиз, таӵе пумиськонъёс пайдаё луо анай-атайёслы но, пиналъёслы но шуыса. Ватсалом на, туэ кык кылолыкъя семинаръёсты радъянъя быдэс огъет кылдытэмын. Со сяна, ужзэ азьланьтоз удмурто-ӟучо нылпиос понна «Нуныкай» центр. Нырысетӥ пумиськон чакламын 4-тӥ тулыспаллы. Ужрад ортчоз «Пельняньлэн дунневыл нуналэз» фестиваль улсын.

Семинарез радъясьёс: Кык кылолыкъя «Билингва» удмурт центр, «Удмурт кенеш» огазеяськон, Ижкарысь Эшъяськон юрт но Азьмурт грантъёсъя Фондлэн но Удмурт Элькунысь йӧскалык политикая министерство юрттэм улсын.