Логотип БилингваБилингваБилингвизмъя удмурт центр

Телефон: (8 3412) 687-798

E-mail: udmbilingva@yandex.ru
Герӟет тодэтъёс

Трос тодэм нянь уг куры
Ӟеч кидыслэн тысез но ӟеч
Огкылысь улон шулдыр
Тодонлы пуйы кулэ öвöл
Нылпилэн шудэз - анай-атайлэн шудэз
Атаезлэн кылыз чурыт, коркаез шуныт

ИворъёсRSS

билингва семинар

27-тӥ толшоре Калыкъёслэн Эшъяськон юртазы кыккылолыкъя «Билингва» удмурт центр но Вань удмуртъёслэн «Удмурт Кенеш» огазеяськонзы Президент грантъёсъя фондлэн но Удмурт Элькунысь йӧскалык политикая министерстволэн юрттэмзыя кыккылолыкъя (билингвизмъя) семинар радъяло.

Выль Ар но Семинар

Ортчем арня туж узыр вал ортчем ужрадъёсын. Кык кылэз тодӥсь нылпиослэн "Нуныкай" центрзы но "Анай клуб" арня ӵоже трос тунсыко мероприятиос ортчытӥз. Тани кӧняез ке соос пӧлысь:

16 толсуре Калыкъёслэн эшъяськон юртазы удмурт нылпиос понна, кудъёсыз "Нуныкайлэн" занятиосаз но Кыккылолыкъя "Билингва" удмурт центрен ортчытъям пумиськонъёсы ветлӥзы, Выль ар шулдыръяськон радъямын вал. Шулдыръяськонэ 1,5 аресысен 9 аресозь 60 нылпиос мыло-кыдо пыриськизы.

Шумпотымон, котькуд нылпи удмурт кылбурез дышетыса лыктэм. Нылпиос но анай-атайёс Тол Бабаен но Лымы нылэн ӵош удмурт кырӟанъёс кырӟазы, эктӥзы но удмурт кылын шудӥзы. Шулдыръяськон йылпумъяськем бере котькуд нылпи выль ар кузьым басьтӥз. Та Выль ар шулдыръяськон "Кык кылэз тодӥсь нылпиослы "Нуныкай" центр" проектэз йылпумъясь ужрад луиз. Тодады вайытӥськомы, вылӥ нимам проект "Удмурт Кенеш" мерлыко огазеяськонлэн проектэз луыса Ижкар администрацилэн кар конкурсаз пыриськыса вормисе потӥз вал шуыса.

2KRcYSNHFJI 18 толсуре "Вмясо" кафеын Удмурт егитъёслэн "Шунды" мерлыко огазеяськоонзы йырвизез сынась "Шудком" шудонэз таяз арын берпуметӥзэ радъяз. Удмурт анай-атайёслэн "Анай клуб" командазы та шудонын куинетӥ инты басьтӥз! Ӟечокъёс!

Боулинг 20 толсуре Удмурт анай-атайёслэн клубзылэн таяз арын берпуметӥ пумиськонзы ортчиз. Таяз учыре ужрад боулингын радъямын вал, отчы 10 удмурт семья пыриськиз.

Семинар11

Калыкъёслэн Эшъяськон юртазы 16 толсуре Кыккылолыкъя XI семинар ортчиз.

Таяз учыре семинаре ӧтемын вал Кыккылолыкъя "Билингва" удмурт центрлэн семинаръёсаз (проект азинскиз Удмурт Элькунысь йӧскалык политикая министерстволэн юрттэмезъя), "Анай клублэн" пумиськонъёсаз (анай-атайёслэн мылкыд каремзыя но тыршемзыя азинскись проект) но "Нуныкай" кыккылъем нылпиослэн центразы радъям занятиосы (Ижкар администрацилэн но "Удмурт Кенеш" огазеяськонлэн юрттэмзыя азинскись проект) 2017 арын ветлэм анай-атайёс но нылпиос. Семинаре 33 удмурт семья пыриськиз (регистрациез ортчем семьяосты лыдъяса).

Семинарез радъясьёс: Кыккылолыкъя "Билингва" удмурт центр, Удмурт Элькунысь йӧскалык политикая министерство, Калыкъёслэн Эшъяськон юртсы.

Семинарын 2017 арын кыккылолыкен герӟаськем азинскись ӵектосъёс пумысен анай-атайёс мылкыдъёссэс вераса потӥзы, вуоно арын ӵектосъёсты азинтыны дэмланъёс сётӥзы.

Со сяна семинаре люкаськемъёс ӵектосъёсты азинтӥсьёслы трос тау кылъёс веразы, асьсэос но удмурт кылэз вӧлмытон борды мыло-кыдогес басьтӥськыны мылдзэс шараязы.

Семинар ф6

16 толсуре Калыкъёслэн Эшъяськон юртаз, многофункциональной залын, 12 часысен удмурт нылпиослы Выль ар шулдыръяськон радъямын луоз.

Шулдыръяськонэ ужрадэз радъясьёс витё нылпиосты, кудъёсыз ветло "Нуныкай" центрлэн занятиосаз но Кыккылолыкъя "Билингва" удмурт центрен радъям семинаръёсы анай-атайёсын ӵош вуыло. Ужрадэз радъяло Кыккылъем нылпиослэн "Нуныкай" центрысь ӧнерчиос "Удмурт Кенеш" огазеяськонлэн но Ижкар администрацилэн, Калыкъёслэн Эшъяськон юртлэн юрттэмзыя.

Нылпиосты тунсыко программа возьма. Кызьы пусъё шулдыръяськонэз радъясьёс, интыос ваньзылы уз тырме, соин ик "ВКонтакте" вотэсбамысь "Нуныкай" группаын ужрад сярысь пост улын комментариосын гожтӥськон усьтэмын, кудӥз 15-тӥ толсурозь усьтэмын. Со сяна Выль ар шулдыръяськонэз радъясьёс туж куро Тол Бабайлы удмурт кылын кылбур дышетыны но одно ик маскаръяськон костюмъёсын лыктыны.

семинар в Коми

Сыктывкарысь Калыкъёслэн Эшъяськон юртазы 9 толсуре кыккылолыклы сӥзем семинар ортчиз. Семинарез радъязы "Коми войтыр" огазеяськон но коми анай-атайёс, кудъёсыз семьяосазы анай кылэз возьыны тыршо.

Семинарез нуиз Ижкарысь кыккылолыкъя ӧнерчи, "Кыккылолыкъя "Билингва" удмурт центр" но "Кык кылэз тодӥсь нылпиослы "Нуныкай" центр" проектъёслэн валтӥсьсы Татьяна Волкова.

Татьяна Волкова семинаре люкаськемъёсты Кыккылолыкъя "Билингва" удмурт центр" (Удмурт Элькунысь йӧскалык политикая министерстволэн кичӧлтэмезъя но юрттэмезъя азинскись проект), "Анай клуб" (удмурт анай-атайёслэн тыршемзыя азинскись прект) но "Кык кылэз тодӥсь нылпиослы "Нуныкай" центр" (Ижкар администрацилэн юрттэмезъя но "Удмурт Кенеш" огазеяськонлэн кичӧлтэмезъя азинскись проект) проектъёслэн кылдэмзы но азинскемзы сярысь вераса потӥз, пӧртэм ужан формаосты но пумиськись шуг-секытъёсты шараяз.

Озьы ик "Билингва. Кырын кыккылолыкез азинтонъя ужан амалъёс" Президент грантъёслэн фондэзлэн, Удмурт Элькунысь йӧскалык политикая министерстволэн но "Удмурт Кенеш" огазеяськонлэн юрттэмзыя ужаны кутскем проектлэн азьланяз азинскеменыз тодматӥз.

Коми анай-атайёс семинарлэн ужаз мыло-кыдо пыриськизы, та ужпумен тунсыкъяськонзэс возьматӥзы, асьсэлэн уженызы тодматӥзы но трос юанъёс сётъязы, малы ке шуоно Сыктывкарын но вуоно арын анай-атайёс понна кыкылолыкъя семинаръёсты радъяны малпало.

Ми сярысь

Билингвизмъя (кыккылолыкъя) "БИЛИНГВА" удмурт центр – со проект, кудзэ азинтыны юрттыны быгатэ котькудӥз, кин кыккылолыкен тунсыкъяське но нылпизэ пӧртэм кылъёсын вераськытыны мылкыд каре.

Проектэз азинтон улсын кылдытэмын сайт, кудӥлэн бамысьтыз шедьтыны быгатоды:

  • нылпиослэн кыккылолыксы сярысь теория но практикая тунсыко луись юанъёслы валэктонъёсты;
  • билингвология удысысь валтӥсь тодосчиослэсь ужъёссэс;
  • пичи нылпиослэсь вераськон быгатонлыкъёссэс азинтонын уже кутыны луоно удмурт кылын материалъёсты (шудонъёсты, йырвизез сынась ужъёсты, мадиськонъёсты, выжыкылъёсты, занятиослы амалтодослыко юрттэтъёсты но мукет);
  • анай-атайёслы но дышетӥсьёслы чаклам "ЮАН-ВЕРАН" ёзэтэз.

Билингвизмъя (кыккылолыкъя) "БИЛИНГВА" удмурт центрлэсь ужзэ азинтон улсын озьы ик удмурт кылын вераськись анай-атайёс но соослэн нылпиоссы (нылпи садэ яке 1–2-тӥ классэ ветлӥсьёсыз) понна кыккылолыкъя семинаръёс радъясько.

Проект «Россиын улӥсь калыкъёслэсь кусыпъёссэс юнматон но лулчеберетсэс азинтон (2014–2020-тӥ аръёс)» нимысьтыз ужась федерал кун программаез но «Йӧскалыкъёслэсь кусыпъёссэс юнматон но мерлыко улонзэс азинтон» Удмурт Элькунысь кун программаез быдэстон улсын кылдытэмын но азинтӥське.

Удмурт-ӟуч кыккылолыкез кылдытонын азинсконъёссы сярысь вераны дышетӥсьёсты но нылпи садын ужасьёсты, тодосчиосты, анай-атайёсты но вань мылкыд карисьёсты ӵош ужаны ӧтиськом.